موضوع: لو انت عندك عجلة هاتها وتعالى .... ولو معندكش تعالى برضه !!! الأربعاء يونيو 02, 2010 8:07 am
الناس بتعتبر البني آدم اللي سايق عجلة، ولابس لبس رياضي، وحاطط على دماغه خوذة.. كائن فضائي ! ولو الناس شافت بنت سايقة عجلة في وسط البلد، هيمسكوه تريقة للصبح..
نفسنا نفهم ليه ؟؟؟
ومع ذلك، فيه مجموعة من الشباب قرروا يغيروا الواقع ده، ويخلوا الدراجات وسيلة المواصلات الأساسية في القاهرة، عشان يحلوا أزمات كتير، زي «التلوث، الزحمة»، تعالوا نتعرف عليهم أكتر.. من مصطفى حسين، أحد المنظمين وأصحاب الفكرة. إحكي لنا عن البداية؟ إحنا تقريبا كنا 3 أو4، بنهوى ركوب العجل لمسافات طويلة، ونسافر بيه، ونستخدمه داخل القاهرة، فقلنا ليه ما نحاولش ننشر الفكرة، بإيجابياتها الكتيرة، فبدأنا بعمل جروب على الفيس بوك في فبراير 2008، وصل أعضاؤه دلوقتي لـ3600، طبعا مش كلهم بيشاركوا، لكن فيه عدد مش بطال بيجي معانا. إيه كان هدف الجروب؟ أولا: نشر فكرة الدراجات كوسيلة مواصلات، عشان نخف زحمة العربيات في الشارع شوية. ثانيا: القضاء على التلوث الناتج عن دخان العربيات. ثالثا: كرياضة، حاجة كويسة الناس بتعملها ببلاش. رابعا: تشجيع البنات على ركوب العجل في وسط المدينة، بدون ما حد ينتقدهم. هل للجروب نشاطات تانية؟ فيه أنشطة اجتماعية كتير بدأنا نعملها مؤخرا، مرة مثلا شاركنا مجموعة أصحاب في إصلاح مدرسة قديمة، في مكان اسمه «عزبة أبو قرن»، ومرة نضفنا حوالين الهرم، وكل جمعة تقريبا بنعمل رحلة أو حدث، وبنحاول ننشر الفكرة، ونشجع الناس عليها، وده ظهر قوي في اليوم المصري للدرَّاجين. وإيه اليوم المصري للدرَّاجين؟ إحنا كنا أول جروب بدأ موضوع الدراجات، وبعد كده، بقى فيه أكتر من جروب، منهم اللي عايز يركب عجل جبلي بس، وناس عايزة تركب مسافات طويلة، ومن حوالي 5 شهور، اقترح صديقنا «محمد الأنصاري» تجميع كل المهتمين بالدراجات في يوم واحد، عشان نلفت انتباه الناس، وقررنا يكون أول جمعة من شهر مارس، وكان أول مرة نحتفل بيه يوم 5 مارس 2010، واخترنا اليوم ده عشان بيكون مفيش امتحانات ولسه الصيف ماجاش والجو مش حر قوي. لو حد عايز يشترك وماعندوش عجلة.. يعمل إيه؟
يتابع معانا الجروب على الفيس بوك، وإحنا نوصله للناس اللي بيبيعوا أو بيأجروا العجل.
بتنصح الناس اللي بتركب عجل بإيه؟
مشكلة العجلة إن العربيات مابتسمعش صوتها، لكن ميزتها إنك تقدر تسمع كل اللي جاي وراك، فياريت ماحدش يلبس سماعات وهو سايق، ويخلي باله من الطريق، ويلتزم بقواعد المرور، ويمشي صف جنب الرصيف على اليمين، ومانقفش فجأة مرة واحدة، لو هنقف، نهدّي سِنّة سِنّة لو هنخش يمين أو شمال، عشان ماحدش يخبط فينا.
لو انت عندك عجلة هاتها وتعالى .... ولو معندكش تعالى برضه !!!
المنشورات 
موضوع: لو انت عندك عجلة هاتها وتعالى .... ولو معندكش تعالى برضه !!! 
الأربعاء يونيو 02, 2010 8:07 am